Këngë zemre.

Pa eja dashuri të puthemi ëmbël
Emrin ta gdhendim pemëve gjithkund
Të këndojmë të dy muzgut të mbrëmjes
Mes fërshfërima gjethesh që flladi i tund

Eja dashuri të lundrojmë në hënë
Në liqenin e qiellit mes yjesh zambak
Të zgjojmë zogjtë që degëve flenë
Me tinguj ritmik të zemrave, tik-tak

Eja dashuri të lodrojmë kitarën
Telat t’ja skuqim shpirtit violinë
Të zgjojmë nëndheut rrënjën e farën
Sythe pranvere gjithkund të mbijnë

Eja dashuri të shkojmë pranë burimit
Ku shuan etjen bleta puntore
Ku lanë sytë dielli i agimit
Ku mijra vargje lidhen përdore

Eja dashuri m'u ul në zemër
Ëndrra të tjera të zgjojmë pafund
Telat e shpirtit t'i tundim ëmbël
Këng’e zemrës të dëgjohet gjithkund

Shkroi : Leonard Seiti